=================
ເພື່ອເປັນການສ້າງຂະບວນການເນື່ອງໃນໂອກາດວັນສາກົນຕ້ານການຄ້າມະນຸດ 30 ກໍລະກົດ 2026 ຄົບຮອບ 12 ປີ (2013-2026) ໃຫ້ມີບັນຍາກາດຟົດຟື້ນ ແລະ ມີຄວາມໝາຍເລິກເຊິ່ງ ພະແນກສຶກສາທິການ ແລະ ກິລາ ແຂວງສະຫວັນນະເຂດ ໄດ້ຈັດການແຂ່ງຂັນກິລາເປຕັງມິດຕະພາບຂຶ້ນ ໂດຍການເຂົ້າຮ່ວມຂອງບັນດາຜູ້ບໍລິຫານການສຶກສາ, ຄູ-ອາຈານ ແລະ ພະນັກງານ-ລັດຖະກອນ ອ້ອມຂ້າງພະແນກຢ່າງເປັນຂະບວນການກວ້າງຂວາງ.
.
ພິທີດັ່ງກ່າວ ໄດ້ຮັບກຽດເຂົ້າຮ່ວມໂດຍ ທ່ານ ອະນຸສອນ ສຸດທິວົງ ວ່າການຫົວໜ້າພະແນກສຶກສາທິການ ແລະ ກິລາແຂວງສະຫວັນນະເຂດ, ທ່ານ ນາງ ບໍ່ແກ້ວ ແກ້ວພາວັນ ຮອງຫົວໜ້າພະແນກ, ທ່ານ ພັນເອກ ລຳຄູນ ວໍລະວົງ ຫົວໜ້າພະແນກ ຖວທ ແຂວງສະຫວັນນະເຂດ, ພ້ອມດ້ວຍບັນດາຫົວໜ້າຂະແໜງ, ຜູ້ອຳນວຍການສູນ, ຜູ້ບໍລິຫານໂຮງຮຽນ ແລະ ນັກກິລາເຂົ້າຮ່ວມຢ່າງພ້ອມພຽງ.
.
ການແຂ່ງຂັນກິລາໃນຄັ້ງນີ້ ບໍ່ພຽງແຕ່ເປັນການສົ່ງເສີມສຸຂະພາບ ແລະ ຮັດແໜ້ນຄວາມສາມັກຄີຮັກແພງລະຫວ່າງພະນັກງານເທົ່ານັ້ນ, ແຕ່ຍັງເປັນເວທີສຳຄັນໃນການໂຄສະນາ, ປູກຈິດສຳນຶກ ແລະ ສື່ສານຢ່າງແຂງແຮງກ່ຽວກັບການຕ້ານການຄ້າມະນຸດ. ຈຸດປະສົງຫຼັກແມ່ນເພື່ອໃຫ້ພະນັກງານ, ຄູ-ອາຈານ, ນັກຮຽນ-ນັກສຶກສາ ແລະ ທົ່ວສັງຄົມ ໄດ້ຮັບຮູ້ເຖິງໄພອັນຕະລາຍຂອງການຄ້າມະນຸດ ໂດຍສະເພາະການຫຼອກລວງຜ່ານສື່ສັງຄົມອອນລາຍ, ພ້ອມທັງຊຸກຍູ້ໃຫ້ໂຮງຮຽນກາຍເປັນສະພາບແວດລ້ອມທີ່ປອດໄພສຳລັບເດັກນ້ອຍ ແລະ ເຍົາວະຊົນ.
.
ຜ່ານການແຂ່ງຂັນອັນຟົດຟື້ນ ແລະ ເຕັມໄປດ້ວຍນ້ຳໃຈນັກກິລາ, ຜົນການແຂ່ງຂັນມີລາຍລະອຽດດັ່ງນີ້:
- ລາງວັນຊະນະເລີດ : ສູນການສຶກສານອກໂຮງຮຽນ
- ລາງວັນຮອງຊະນະເລີດ : ໂຮງຮຽນ ມສ ສະຫວັນ
- ລາງວັນຊົມເຊີຍ : ໂຮງຮຽນ ມສ ອຸດົມວິໄລ ແລະ ຂະແໜງຈັດຕັ້ງ ແລະ ພະນັກງານ
.
ການແຂ່ງຂັນກິລາເປຕັງຄັ້ງນີ້ ໄດ້ປິດສາກລົງດ້ວຍຜົນສຳເລັດອັນຈົບງາມ, ເຊິ່ງສາມາດບັນລຸເປົ້າໝາຍໃນການສົ່ງເສີມນ້ຳໃຈນັກກິລາ "ຮູ້ແພ້, ຮູ້ຊະນະ, ຮູ້ອະໄພ". ພ້ອມດຽວກັນນັ້ນ, ຍັງເປັນການສ້າງເຄືອຂ່າຍຄວາມຮ່ວມມືຢ່າງແໜ້ນແຟ້ນລະຫວ່າງພະນັກງານ-ລັດຖະກອນ ໃນການຮ່ວມມືກັນເປັນກຳລັງແຮງເພື່ອຕ້ານ ແລະ ສະກັດກັ້ນບັນຫາການຄ້າມະນຸດໃນສັງຄົມຢ່າງຈິງຈັງ.
✍️ ແຫຼ່ງຂ່າວ: ພະແນກສຶກສາທິການ ແລະ ກິລາ