ພາລະບົດບາດ ຂອງພະແນກ

ທີ່ຕັ້ງ ແລະ ພາລະບົດບາດ

ພະແນກສຶກສາທິການ ແລະ ກິລາແຂວງ ຂຽນດ້ວຍອັກສອນຫຍໍ້ວ່າ “ສກຂ” ເປັນອົງການບໍລິຫານ ຕາມສາຍຕັ້ງໃນລະບົບບໍລິຫານ, ຄຸ້ມຄອງ ຂອງກະຊວງການສຶກສາທິການ ແລະ ກິລາ ຊຶ່ງມີພາລະບົດບາດ ໃນການຜັນຂະຫຍາຍ, ວາງແຜນ, ຈັດຕັ້ງປະຕິບັດ, ຄຸ້ມຄອງ, ກວດກາ ແລະ ປະເມີນຜົນວຽກງານການສຶກສາ, ວິທະຍາສາດ ແລະ ກິລາ ໃນຂອບເຂດຄວາມຮັບຜິດຊອບຂອງຕົນ.

ໜ້າທີ່ ແລະ ຂອບເຂດສິດ

ໜ້າທີ່

ພະແນກສຶກສາທິການ ແລະ ກິລາແຂວງ ມີໜ້າທີ່ດັ່ງນີ້:

1. ຜັນຂະຫຍາຍແນວທາງນະໂຍບາຍ, ກົດລະບຽບ, ມະຕິ, ຄຳສັ່ງຂອງພັກ, ກົດໝາຍຂອງລັດ, ທິດທາງ ແຜນການ ແລະ ຍຸດທະສາດຂອງກະຊວງສຶກສາທິການ ແລະ ກິລາ ເພື່ອສ້າງເປັນແຜນພັດທະນາວຽກງານຂອງຕົນ;

2. ສ້າງ, ປັບປຸງ ບັນດາ ນິຕິກໍາ, ລະບຽບການຕ່າງໆ ໃນການຄຸ້ມຄອງວຽກງານການສຶກສາ, ວິທະຍາສາດ ແລະ ກິລາ ພາຍໃນແຂວງ;

3. ໂຄສະນາເຜີຍແຜ່ ກົດໝາຍ, ລະບຽບການ, ແຜນການ, ແຜນງານ, ໂຄງການພັດທະນາການສຶກສາ,ວິທະຍາສາດ ແລະ ກິລາ ພາຍໃນແຂວງ;

4. ປັບປຸງການຈັດຕັ້ງ ແລະ ການຄຸ້ມຄອງການສຶກສາ ແລະ ກິລາ ໃຫ້ສອດຄ່ອງກັບແຜນພັດທະນາ ເສດຖະກິດ-ສັງຄົມຂອງແຂວງ ແລະ ລັດຖະບານ ໃນແຕ່ລະໄລຍະ;

5. ຊີ້ນຳ, ນຳພາ ຈັດຕັ້ງປະຕິບັດແຜນການ ການສຶກສາກ່ອນໄວຮຽນ, ສາມັນສຶກສາ, ການລົບລ້າງຄວາມບໍ່ຮູ້   ໜັງສື, ການຍົກລະດັບ ແລະ ຝຶກອົບຮົມວິຊາຊີບຂັ້ນພື້ນຖານ;

6. ຈັດປຶ້ມຫົວບົດສອບເສັງ, ຈັດຕັ້ງປະຕິບັດການສອບເສັງຈົບຊັ້ນ, ອອກປະກາສະນິຍະບັດຊັ້ນມັດທະຍົມ ຕອນປາຍໃນໂຮງຮຽນ ທັງພາກລັດ ແລະ ເອກະຊົນ ແລະ ຂຶ້ນທະບຽນປະກາສະນິຍະບັດມັດທະຍົມ ຕອນຕົ້ນ ແລະ ອາຊີວະສຶກສາຊັ້ນຕົ້ນ;

7. ຄົ້ນຄວ້າ ແລະ ຄັດເລືອກ ການໃຫ້ຕໍາແໜ່ງວິຊາການ ພາຍໃນແຂວງ;

8. ສ້າງ, ພັດທະນາຫຼັກສູດທ້ອງຖິ່ນ, ອຸປະກອນ, ສື່ການຮຽນ-ການສອນ ແລະ ສິ່ງອໍານວຍຄວາມດວກຕ່າງໆ ເພື່ອຮັບໃຊ້ວຽກງານການສຶກສາ, ວິທະຍາສາດ ແລະ ກິລາ ພາຍໃນແຂວງ

9. ຄຸ້ມຄອງບັນດາ ໂຮງຮຽນມັດທະຍົມຕອນປາຍ, ມັດທະຍົມສົມບູນ, ໂຮງຮຽນສາມັນກິນນອນຊົນເຜົ່າໂຮງຮຽນວິຊາຊີບ, ສູນຝຶກວິຊາຊີບ, ສູນສຶກສານິເທດ, ສູນໄອຊີທີ, ສູນການສຶກສານອກໂຮງຮຽນ, ວິທະຍາໄລ, ສະຖານການສຶກສາສົງ, ສະໂມສອນກິລາ, ຫົວໜ່ວຍທຸລະກິດກິລາ, ສະໜາມກິລາ ແລະ ຫົວໜ່ວຍວິຊາການອື່ນ ທີ່ຂຶ້ນກັບແຂວງ,

10. ສ້າງແຜນພັດທະນາຊັບພະຍາກອນມະນຸດ, ແຜນການກໍ່ສ້າງ, ຝຶກອົບຮົມ, ຍົກລະດັບຄູ ຝຶກກິລາ- ກາຍຍະກຳ ແລະ ບຸກຄະລາກອນການສຶກສາ ແລະ ກິລາ ພາຍໃນແຂວງ

11. ສ້າງແຜນການຈັດຕັ້ງການຮຽນ-ການສອນ ກ່ຽວກັບການສຶກສາຮຽນຕໍ່ຕະຫຼອດຊີວິດ ພາຍໃນແຂວງ,

12. ຈັດຕັ້ງປະຕິບັດວຽກງານພະລະ ແລະ ສິລະປະສຶກສາ, ກິລາ-ກາຍຍະກຳ ມວນຊົນ, ກິລາລະດັບສູງ ພາຍໃນແຂວງ

13. ຄຸ້ມຄອງ, ສ້າງຖານເກັບກຳຂໍ້ມູນ ຂ່າວສານການສຶກສາ ແລະ ກິລາ, ຄູ ແລະ ນັກຮຽນພາຍໃນແຂວງ;

14. ຄຸ້ມຄອງຄູ ແລະ ບຸກຄະລາກອນການສຶກສາ ແລະ ກິລາ ຕາມການແບ່ງຂັ້ນຄຸ້ມຄອງ;

15. ຄົ້ນຄວ້າ ການບັນຈຸ, ສັບຊ້ອນ, ການແຕ່ງຕັ້ງ, ຍົກຍ້າຍ, ປົດຕຳແໜ່ງ, ຍ້ອງຍໍ, ປະຕິບັດວິໄນ, ການກຳນົດຕຳແໜ່ງງານຂອງຄູ ແລະ ບຸກຄະລາກອນການສຶກສາ ແລະ ກິລາ ຕາມກົດໝາຍ ແລະ ລະບຽບການ;

16. ຄຸ້ມຄອງ ແລະ ບໍລິຫານງົບປະມານການເງິນ, ການບັນຊີ, ຊັບສິນ-ວັດສະດຸ, ການປຸກສ້າງ-ສ້ອມແປງ, ການຈັດຊື້-ຈັດຈ້າງດ້ວຍທຶນຂອງລັດ, ການເຊັນສັນຍາຜູກພັນ ແລະ ຊຳລະສະສາງການຈັດຊື້, ຈັດຈ້າງ ຕາມການແບ່ງຂັ້ນຄຸ້ມຄອງ ພ້ອມທັງສະຫຼຸບ ແລະ ລາຍງານ ຕາມລະບຽບທີ່ໄດ້ກຳນົດໄວ້;

17. ປະສານສົບທົບກັບພາກສ່ວນຕ່າງໆ ແລະ ນໍາເອົາຜົນສຳເລັດຂອງການຄົ້ນຄວ້າ ທາງດ້ານວິທະຍາສາດ ແລະ ນະວັດຕະກໍາ ຈັດຕັ້ງເຜີຍແຜ່ ໃຫ້ແກ່ການຈັດຕັ້ງ ແລະ ສັງຄົມ ພາຍໃນແຂວງ,

18. ເກັບກຳ, ແນະນຳ, ບໍລິການ ແລະ ສະໜອງຂໍ້ມູນຂ່າວສານ ທາງດ້ານວິທະຍາສາດ ແລະ ນະວັດຕະກຳ ໃຫ້ແກ່ການຈັດຕັ້ງ ແລະ ສັງຄົມ ພາຍໃນແຂວງ ຢ່າງທົ່ວເຖິງ;

19. ຊີ້ນຳ ຫ້ອງການສຶກສາທິການ ແລະ ກິລາ ເມືອງ, ນະຄອນ,

20. ພົວພັນ, ຮ່ວມມື ກັບສາຍຕັ້ງ, ສາຍຂວາງ ແລະ ອົງການຈັດຕັ້ງສາກົນ ທັງພາຍໃນ, ເພື່ອພັດທະນາການສຶກສາ ແລະ ກິລາພາຍໃນແຂວງ ຕາມການມອບໝາຍ;

21. ຊີ້ນຳ, ຊຸກຍູ້, ຕິດຕາມ, ກວດກາ ແລະ ປະເມີນຜົນ, ປະກັນຄຸນນະພາບ ແລະ ສະຫຼຸບ ລາຍງານການຈັດຕັ້ງປະຕິບັດວຽກງານການສຶກສາ, ວິທະຍາສາດ ແລະ ກິລາ ໃຫ້ສາຍຕັ້ງ ແລະ ສາຍຂວາງທີ່ຕົນຂຶ້ນກັບ ໃນແຕ່ລະໄລຍະ;

22. ປະຕິບັດໜ້າທີ່ອື່ນ ຕາມການມອບໝາຍ ຂອງກະຊວງສຶກສາທິການ ແລະ ກິລາ ແລະ ເຈົ້າແຂວງ

ຂອບເຂດສິດ

ພະແນກສຶກສາທິການ ແລະ ກິລາແຂວງ, ນະຄອນຫຼວງ ມີຂອບເຂດສິດ ດັ່ງນີ້;

1. ສະເໜີຕໍ່ລັດຖະມົນຕີ ແລະ ເຈົ້າແຂວງ ພິຈາລະນາ ແລະ ຮັບຮອງ ແຜນພັດທະນາການສຶກສາ, ວິທະຍາສາດ ແລະ ກິລາ;

2. ສະເໜີຕໍ່ລັດຖະມົນຕີ ພິຈາລະນາ ແລະ ຮັບຮອງແຜນພັດທະນາຊັບພະຍາກອນມະນຸດ, ແຜນການກໍ່ສ້າງ, ຝຶກອົບຮົມ, ຍົກລະດັບຄູ ແລະ ບຸກຄະລາກອນການສຶກສາ ແລະ ກິລາ ພາຍໃນແຂວງ

3. ສະເໜີຕໍ່ລັດຖະມົນຕີ ແລະ ເຈົ້າແຂວງ ຈັດຕັ້ງການແຂ່ງຂັນກິລາ-ກາຍຍະກຳ ມ່ວນຊົນ, ກິລາລະດັບສູງ ແລະ ກີລານັກຮຽນ ພາຍໃນແຂວງ

4. ສະເໜີລັດຖະມົນຕີພິຈາລະນາ, ອະນຸມັດ, ປັບປຸງ, ສ້າງ ຫຼື ຍຸບເລີກບັນດານິຕິກຳຄຸ້ມຄອງການສຶກສາ ແລະ ກິລາ ທີ່ບໍ່ສອດຄ່ອງ;

5. ສະເໜີຕໍ່ລັດຖະມົນຕີ ແລະ ເຈົ້າແຂວງ ພິຈາລະນາ, ອະນຸມັດ, ສ້າງຕັ້ງ ຫຼື ຍຸບເລີກການຈັດຕັ້ງ, ສະຖານການສຶກສາ ແລະ ສະໜາມກິລາ ໃນຂັ້ນຄຸ້ມຄອງຂອງຕົນ;

6. ສະເໜີການແຕ່ງຕັ້ງ, ປົດຕຳແໜ່ງ, ບັນຈຸ, ສັບຊ້ອນ, ຍົກຍ້າຍ, ຍ້ອງຍໍ, ປະຕິບັດວິໄນ, ການກໍານົດຕຳແໜ່ງງານຂອງຄູ ແລະ ບຸກຄະລາກອນການສຶກສາ ແລະ ກິລາ ຕາມການແບ່ງຂັ້ນຄຸ້ມຄອງ ແລະ ຕາມກົດໝາຍ ແລະ ລະບຽບການ;

7. ຄຸ້ມຄອງ ແລະ ນຳໃຊ້ ງົບປະມານ, ວັດຖຸ-ຊັບສິນ, ກອງທຶນ, ທຶນຊ່ວຍເຫຼືອປະເພດຕ່າງໆ ຕາມການ ອະນຸມັດຂອງລັດຖະມົນຕີ ແລະ ເຈົ້າແຂວງ;

8. ປະຕິບັດໂຄງການຊ່ວຍເຫຼືອລ້າ, ໂຄງການຮ່ວມມືກັບຕ່າງປະເທດ ຕາມການອະນຸມັດຂອງລັດຖະມົນຕີ ຫຼື ເຈົ້າແຂວງ ແລະ ອົງການຈັດຕັ້ງສາກົນ

9. ສະເໜີລັດຖະມົນຕີ ຄຸ້ມຄອງ ຊັບສິນທາງປັນຍາ ແລະ ລິຂະສິດທາງດ້ານການສຶກສາ ແລະ ກິລາ;

10. ປະຕິບັດວຽກງານອື່ນຕາມການມອບໝາຍຂອງລັດຖະມົນຕີ, ເຈົ້າແຂວງ,

ໂຄງປະກອບການຈັດຕັ້ງ

ໂຄງປະກອບກົງຈັກ

ໂຄງປະກອບກົງຈັກ ຂອງພະແນກສຶກສາທິການ ແລະ ກິລາ ແຂວງ ປະກອບມີ 10 ຂະແໜງ ດັ່ງນີ້;

1. ຂະແໜງບໍລິຫານ ແລະ ການເງິນ

2. ຂະແໜງຈັດຕັ້ງ ແລະ ພະນັກງານ

3. ຂະແໜງສະຖິຕິ, ແຜນການ ແລະ ຮ່ວມມືກັບຕ່າງປະເທດ

4. ຂະແໜງກວດກາ, ປະເມີນຜົນ ແລະ ປະກັນຄຸນນະພາບ

5. ຂະແໜງການສຶກສາກອນໄຮຽນ

6. ຂະແໜງສາມັນສຶກສາ

7. ຂະແໜງວິທະຍາສາດ, ອາຊີວະສຶກສາ ແລະ ການສຶກສາຊັ້ນສູງ

8. ຂະແໜງການສຶກສານອກໂຮງຮຽນ ແລະ ຝຶກອົບຮົມວິຊາຊີບຂັ້ນພື້ນຖານ

9. ຂະແໜງພັດທະນາຄູ

10. ຂະແໜງກິລາ-ກາຍຍະກຳ ແລະ ສິລະປະສຶກສາ

ສຳລັບຂະແໜງກິລາ-ກາຍຍະກຳ ຖ້າແຂວງໃດມີຄວາມຈຳເປັນ ແລະ ບໍລິມາດວຽກກວ້າງຂວາງ ກໍສາມາດແຍກອອກເປັນ 2 ຂະແໜງ ຄື: ຂະແໜງພະລະ ແລະ ສິລະປະສຶກສາ ແລະ ຂະແໜງກິລາລະດັບສູງ ຕາມຄວາມເໝາະສົມ;

ນອກຈາກນັ້ນຍັງປະກອບມີ ໂຮງຮຽນມັດທະຍົມຕອນປາຍ, ໂຮງຮຽນມັດທະຍົມສົມບູນ, ໂຮງຮຽນ ສາມັນກົນນອນຊົນເຜົ່າ, ໂຮງຮຽນວິຊາຊີບ, ສູນຝຶກວິຊາຊີບ, ສູນໄອຊີທີ, ສູນການສຶກສານອກໂຮງຮຽນ, ວິທະຍາໄລ, ສະຖານການສຶກສາສົງ, ສະໂມສອນກິລາ, ຫົວໜ່ວຍທຸລະກິດກິລາ, ສະໜາມກິລາ ແລະ ຫົວໜ່ວຍວິຊາການອື່ນ ໂດຍມີຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວສະເພາະ ພາຍໃຕ້ການຄຸ້ມຄອງຂອງ ພະແນກສຶກສາທິການ ແລະ ກິລາ ແຂວງ ໂດຍການເຫັນດີເປັນເອກະພາບ ຂອງກະຊວງສຶກສາທິການ ແລະ ກິລາ ແລະ ພາກສ່ວນທີ່ກ່ຽວຂ້ອງ.

ໂຄງປະກອບບຸກຄະລາກອນ

1. ຫົວໜ້າພະແນກ ຈຳນວນ 01 ທ່ານ, ມີຄວາມຮັບຜິດຊອບຕໍ່ ເຈົ້າແຂວງ ແລະ ລັດຖະມົນຕີກະຊວງສຶກ ສາທິການ ແລະ ກິລາ ໃນການຄຸ້ມຄອງຕາມຂະແໜງການຕົນຮັບຜິດຊອບ ຊຶ່ງມີໜ້າທີ່ ແລະ ຂອບເຂດ ສິດ ຕາມທີ່ກຳນົດໄວ້ໃນ ມາຕຕາ 3 ແລະ ມາດຕາ 4 ຂອງຂໍ້ຕົກລົງສະບັບນີ້;

ໃນເວລາຕິດຂັດ ຫົວໜ້າພະແນກ ຕ້ອງມອບສິດໃຫ້ຮອງຫົວໜ້າພະແນກທ່ານໃດໜຶ່ງ ເປັນຜູ້ຮັກສາການແທນ

2. ມີຮອງຫົວໜ້າພະແນກ ຈຳນວນໜຶ່ງ ຊ່ວຍຫົວໜ້າພະແນກ ໃນການຊີ້ນໍາວຽກງານຂອງຕົນ, ຮັບຜິດຊອບວຽກງານໃດໜຶ່ງ ຕາມການມອບໝາຍຂອງຫົວໜ້າພະແນກ;

ຮອງຫົວໜ້າພະແນກເປັນຜູ້ຮັກສາການແທນ ໃນເວລາຫົວໜ້າພະແນກຕິດຂັດ ພ້ອມທັງລາຍງານວຽກງານທີ່ໄດ້ຈັດຕັ້ງປະຕິບັດໃນໄລຍະຮັກສາການແທນນັ້ນ ໃຫ້ຫົວໜ້າພະແນກພາຍຫຼັງກັບມາປະຈຳການ.

3. ຫົວໜ້າຂະແໜງ, ຮອງຫົວໜ້າຂະແໜງ ແລະ ລັດຖະກອນວິຊາການຈຳນວນໜຶ່ງ ຮັບຜິດຊອບວຽກງານ ຕາມການກຳນົດຕຳແໜ່ງງານ ຂັ້ນເທິງມະນຸມັດ.

ສໍາລັບການບັນຈຸ, ສັບຊ້ອນ, ແຕ່ງຕັ້ງ, ຍົກຍ້າຍ ຫຼື ປົດຕໍາແໜ່ງ ແມ່ນປະຕິບັດຕາມກົດໝາຍ ແລະ ລະບຽບການ.