=================
ໃນວັນທີ 31 ສິງຫາ 2026 ນີ້ ທີ່ພະແນກສຶກສາທິການ ແລະ ກິລາແຂວງສະຫວັນນະເຂດ ເນື່ອງໃນໂອກາດກະກຽມໄຂສົກຮຽນໃໝ່ ປະຈຳສົກປີ 2026-2027 ທີ່ກຳລັງຈະມາເຖິງ ໄດ້ມີພິທີມອບ-ຮັບທຶນ ແລະ ອຸປະກອນການສຶກສາ ມູນຄ່າລວມ 680,000,000 ກີບ ເພື່ອປະກອບສ່ວນຊ່ວຍເຫຼືອນັກຮຽນກິນນອນໃນເຂດຫ່າງໄກສອກຫຼີກ ຂອງເມືອງນອງ ແລະ ເມືອງເຊໂປນ.
.
ຕາງໜ້າບັນດາບໍລິສັດທີ່ຮ່ວມລະດົມທຶນກ່າວມອບໂດຍ ທ່ານ ຄໍາພູນ ຕຸໄພທູນ ພະນັກງານບໍານານ ອະດີດຮອງປະທານຄະນະກຳມະການປົກຄອງແຂວງສະຫວັນນະເຂດ ເຊິ່ງມີພາກສ່ວນທຸລະກິດທີ່ຮ່ວມປະກອບສ່ວນໃນຄັ້ງນີ້ລວມມີ:
- ບໍລິສັດຂົນສົ່ງສາກົນຈຳກັດ
- ບໍລິສັດຊັນເປເປີ້ ໂຮນດິ້ງລາວ ຈຳກັດ
- ບໍລິສັດ ທະວີສັກ ການຄ້າ ຂາອອກ-ຂາເຂົ້າ ຈຳກັດຜູ້ດຽວ
- ບໍລິສັດເອັນທີພີ ການຄ້ານ້ຳມັນເຊື້ອໄຟລາວຈຳກັດ
- ບໍລິສັດ ທີແອວທີ ບໍ່ແຮ່ ຈຳກັດ
- ບໍລິສັດ ແດນສະຫວັນ ໄອຊີີ ຈຳກັດ
- ບໍລິສັດເທບສິນໄຊກໍ່ສ້າງ ເຄຫະສະຖານ ຈຳກັດຜູ້ດຽວ
ກ່າວຮັບໂດຍ ທ່ານ ອະນຸສອນ ສຸດທິວົງ ວ່າການຫົວໜ້າພະແນກສຶກສາທິການ ແລະ ກິລາແຂວງສະຫວັນນະເຂດ.
.
ໃນໂອກາດນີ້ ທ່ານ ວ່າການຫົວໜ້າພະແນກສຶກສາທິການ ແລະ ກິລາແຂວງ ໄດ້ກ່າວສະແດງຄວາມຮູ້ບຸນຄຸນ ແລະ ຂອບໃຈຢ່າງເລິກເຊິ່ງຕໍ່ນ້ຳໃຈອັນປະເສີດຂອງບັນດາບໍລິສັດ ທີ່ໄດ້ເຫັນຄວາມສຳຄັນຂອງວຽກງານການສຶກສາ ໂດຍສະເພາະແມ່ນການສະໜອງອຸປະກອນທີ່ຈຳເປັນໃນໄລຍະການໄຂສົກຮຽນໃໝ່ ເຊິ່ງເປັນການຊຸກຍູ້ກຳລັງໃຈອັນໃຫຍ່ຫຼວງໃຫ້ນ້ອງນັກຮຽນໃນເຂດຫ່າງໄກສອກຫຼີກໃຫ້ມີເງື່ອນໄຂການຮຽນ ແລະ ການດຳລົງຊີວິດທີ່ດີຂຶ້ນ. ພ້ອມນີ້ ຍັງໄດ້ຢືນຢັນວ່າທາງພະແນກຈະນຳເອົາທຶນ ແລະ ອຸປະກອນດັ່ງກ່າວໄປມອບໃຫ້ບັນດາໂຮງຮຽນເປົ້າໝາຍ ໃຫ້ທັນກັບການເປີດສົກຮຽນໃໝ່ ແລະ ໃຫ້ເກີດຜົນປະໂຫຍດສູງສຸດແກ່ນ້ອງນັກຮຽນ.
✍️ ແຫຼ່ງຂ່າວ: ພະແນກສຶກສາທິການ ແລະ ກິລາ