ສິ້ນສຸດການລໍຄອຍ ພະແນກສຶກສາທິການ ແລະ ກິລາແຂວງສະຫວັນນະເຂດ ປະກາດຜົນສຳເລັດ ບັນຈຸຄູອາສາ 630 ຄົນ ເຂົ້າເປັນລັດຖະກອນ ປີ 2025

ການປະກາດຜົນຄັ້ງນີ້ ສ້າງຄວາມປິຕິຍິນດີ ແລະ ຕື້ນຕັນໃຈຢ່າງສຸດຊຶ້ງໃຫ້ແກ່ບັນດາຄູອາສາສະໝັກ. ຫຼາຍທ່ານນ້ຳຕາຊຶມດ້ວຍຄວາມດີໃຈ ທີ່ຄວາມມານະອົດທົນ ແລະ ຄວາມເສຍສະລະໃນການສິດສອນລູກຫຼານຕະຫຼອດໄລຍະຜ່ານມາ ໄດ້ຮັບການຕອບສະໜອງ ໂດຍສະເພາະຫຼາຍທ່ານທີ່ໄດ້ສູ້ຊົນຢຶດອາຊີບຄູອາສາມາຍາວນານກໍໄດ້ຮັບການບັນຈຸໃນຄັ້ງນີ້ ເຊິ່ງຖືເປັນລາງວັນແຫ່ງຄວາມພາກພຽນທີ່ຍິ່ງໃຫຍ່.

ໃນໂອກາດນີ້ ທ່ານ ປອ ສຸກສົມພອນ ອະໂນໄທ ຫົວໜ້າພະແນກສຶກສາທິການ ແລະ ກິລາແຂວງສະຫວັນນະເຂດ ໄດ້ກ່າວເນັ້ນໜັກວ່າ ຜົນສຳເລັດຄັ້ງນີ້ ແມ່ນເກີດຈາກຄວາມເປັນຫ່ວງເປັນໃຍຂອງຂັ້ນເທິງ ທີ່ມີຕໍ່ຊີວິດການເປັນຢູ່ຂອງຄູອາສາສະໝັກ:

"ການທີ່ພວກເຮົາສາມາດບັນຈຸລັດຖະກອນໃໝ່ໄດ້ເຖິງ 630 ຄົນໃນຄັ້ງນີ້ ບໍ່ແມ່ນເລື່ອງບັງເອີນ ແຕ່ມັນສະແດງໃຫ້ເຫັນເຖິງຄວາມເອົາໃຈໃສ່ ແລະ ຄວາມເປັນຫ່ວງເປັນໃຍຢ່າງເລິກເຊິ່ງ ຂອງພັກ ແລະ ລັດຖະບານ ໂດຍສະເພາະແມ່ນ ກະຊວງສຶກສາທິການ ແລະ ກິລາ ທີ່ໄດ້ຈັດສັນຕົວເລກລັດຖະກອນ ບວກກັບການຊີ້ນຳ-ນຳພາ ຢ່າງໃກ້ຊິດຂອງ ຄະນະນຳແຂວງສະຫວັນນະເຂດ ທີ່ຍາມໃດກໍແນມເຫັນຄວາມສຳຄັນ ແລະ ເຂົ້າໃຈເຖິງຄວາມຫຸ່ງຍາກຂອງຄູອາສາສະໝັກທຸກຄົນ. ທຸກພາກສ່ວນໄດ້ສູ້ຊົນຮ່ວມກັນຢ່າງໜັກ ເພື່ອຜັນຂະຫຍາຍນະໂຍບາຍຂອງພັກ ມາແກ້ໄຂບັນຫາໃຫ້ແກ່ຜູ້ທີ່ມີຜົນງານ ແລະ ອົດທົນລໍຄອຍມາຍາວນານ ໃຫ້ໄດ້ເຂົ້າສັງກັດລັດຖະກອນຢ່າງສົມກຽດ ແລະ ພາກພູມໃຈ."