ເຂົ້າຮ່ວມໃນພິທີມີ ທ່ານ ອຳພອນ ຂາວເພຍສຸພົມ ຮອງຫົວໜ້າພະແນກສຶກສາທິການ ແລະ ກິລາແຂວງ ແລະ ທ່ານ ແສງດາວອນ ສວນອຸໄທ ຮອງຫົວໜ້າ ສກມ ພະລານໄຊ ເປັນປະທານຮ່ວມ, ທີມງານຄູຝຶກຈາກ ວິທະຍາໄລຄູ (ວຄສ), ວິຊາການຈາກຂະແໜງການທີ່ກ່ຽວຂ້ອງ ຈາກພະແນກສຶກສາທິການ ແລະ ກິລາແຂວງ, ພ້ອມດ້ວຍຄູສຶກສານິເທດພາຍໃນ ແລະ ສໍາມະນາກອນເຂົ້າຮ່ວມ. ກອງປະຊຸມຝຶກອົບຮົມໃນຄັ້ງນີ້ ໄດ້ຮັບການສະໜັບສະໜູນງົບປະມານຈາກ ໂຄງການ GPE III (Transforming Education) ເພື່ອແນໃສ່ຍົກລະດັບຂີດຄວາມສາມາດໃຫ້ແກ່ຜູ້ເຮັດວຽກສຶກສານິເທດພາຍໃນ ໃນການຈັດຕັ້ງປະຕິບັດການພັດທະນາວິຊາຊີບຄູແບບຕໍ່ເນື່ອງ (CPD).
ໃນໂອກາດນີ້ ທ່ານ ອຳພອນ ຂາວເພຍສຸພົມ ປະທານກອງປະຊຸມ ໄດ້ເນັ້ນໜັກໃຫ້ ຄູທີ່ເຮັດໜ້າທີ່ນິເທດພາຍໃນ (IPS) ຈົ່ງຍົກສູງຄວາມຮັບຜິດຊອບ, ເອົາໃຈໃສ່ຄົ້ນຄວ້າ ແລະ ກຳແໜ້ນບົດຮຽນຈາກວິທະຍາກອນ ເພື່ອນຳໄປຖ່າຍທອດ ແລະ ຜັນຂະຫຍາຍຕໍ່ໃຫ້ແກ່ຄູສອນພາຍໃນໂຮງຮຽນ ຫຼື ຂົງເຂດທີ່ຕົນຮັບຜິດຊອບ. ຈຸດປະສົງສຳຄັນແມ່ນເພື່ອຊຸກຍູ້, ຕິດຕາມ ແລະ ຊ່ວຍເຫຼືອຄູສອນ ໃຫ້ສາມາດປັບປຸງການຮຽນ-ການສອນ ໃຫ້ມີຄຸນນະພາບດີຂຶ້ນເລື້ອຍໆ.
ພາຍຫຼັງສຳເລັດວາລະກອງປະຊຸມ ຄະນະປະທານ ຍັງໄດ້ລົງເຄື່ອນໄຫວຢ້ຽມຢາມ ແລະ ຕິດຕາມສະພາບການຮຽນ-ການສອນ ຢູ່ ໂຮງຮຽນ ປະຖົມສົມບູນ ໂພສີ ເຊິ່ງປັດຈຸບັນ ໂຮງຮຽນດັ່ງກ່າວ ມີນັກຮຽນທັງໝົດ 184 ຄົນ/ຍິງ 95 ຄົນ. ການລົງຢ້ຽມຢາມຄັ້ງນີ້ ເພື່ອເປັນການໃຫ້ກຳລັງໃຈແກ່ຄູ-ອາຈານ ແລະ ນັກຮຽນ ໃນການສືບຕໍ່ປະຕິບັດໜ້າທີ່ການສິດສອນ ແລະ ຮ່ຳຮຽນໃຫ້ບັນລຸຕາມຄາດໝາຍ.
