=================
ໃນວຽກງານບໍລິຫານການສຶກສາ, ການສ້າງສື່ການຮຽນ-ການສອນ ແລະ ການຮ່າງເອກະສານທາງການຕ່າງໆ ບັນຫາໜຶ່ງທີ່ພະນັກງານ, ຄູ-ອາຈານ ແລະ ນັກຮຽນ-ນັກສຶກສາມັກພົບພໍ້ຄື: ບັນຫາສະຫຼະ-ວັນນະຍຸດລອຍ, ການຕັດຄຳຂຶ້ນແຖວໃໝ່ຜິດພາດ ແລະ ໂຕໜັງສືເປື້ອນເມື່ອເຮັດເປັນຕົວໜາ. ໂດຍຫຼ້າສຸດ ນັກພັດທະນາໄດ້ປ່ອຍຟອນ "ເພັດຊະລາດ ໂອທີ" (Phetsarath OT) ສະບັບປັບປຸງໃໝ່ v4.103 ອອກມາໃຫ້ດາວໂຫຼດໄປນຳໃຊ້ແລ້ວ ເຊິ່ງຖືເປັນທາງເລືອກໃໝ່ທີ່ສາມາດແກ້ໄຂບັນຫາເຫຼົ່ານີ້ໄດ້ຢ່າງສົມບູນແບບ.
.
ເຖິງແມ່ນວ່າປັດຈຸບັນຍັງບໍ່ທັນມີແຈ້ງການໃຫ້ນຳໃຊ້ເປັນການທົດແທນສະບັບເກົ່າຢ່າງເປັນທາງການກໍຕາມ, ແຕ່ການທົດລອງນຳໃຊ້ຟອນສະບັບໃໝ່ນີ້ ຈະຊ່ວຍອຳນວຍຄວາມສະດວກ ແລະ ຍົກລະດັບຄວາມສວຍງາມໃນການພິມເອກະສານໄດ້ຢ່າງຫຼວງຫຼາຍ.
.
📌 ຂໍ້ດີທີ່ໂດດເດັ່ນຂອງ Phetsarath OT v4.103
- ໝົດບັນຫາການຕັດຄຳຜິດພາດ: ໄດ້ຮັບການແກ້ໄຂໃຫ້ສາມາດຕັດຄຳຂຶ້ນແຖວໃໝ່ໃນ Microsoft Word, Excel ແລະ PowerPoint ໄດ້ຢ່າງຖືກຕ້ອງຕາມຂອບເຂດຄຳ ໂດຍບໍ່ເຮັດໃຫ້ສະຫຼະ ຫຼື ວັນນະຍຸດຖືກແຍກອອກ.
- ມາພ້ອມ 12 ນ້ຳໜັກຕົວອັກສອນ: ມີຕັ້ງແຕ່ແບບບາງ (Light) ຈົນເຖິງແບບໜາ (Black) ພ້ອມຕົວອຽງທຸກຮູບແບບ. ເມື່ອກົດປຸ່ມຕົວໜາ (B) ຫຼື ຕົວອຽງ (I) ໃນໂປຣແກຣມ ລະບົບຈະດຶງຟອນແທ້ມາໃຊ້ ໝົດບັນຫາຕົວໜັງສືເປື້ອນ ຫຼື ຊ້ອນກັນ.
- ສະຫຼະ ແລະ ວັນນະຍຸດຈັດວາງຖືກຕ້ອງ: ຜ່ານການທົດສອບກວ່າ 1,204 ຮູບແບບການປະສົມຄຳ ຮັບປະກັນວ່າວັນນະຍຸດຈະບໍ່ລອຍຜິດບ່ອນ ແລະ ບໍ່ຊ້ອນທັບກັນ.
- ບໍ່ເຮັດໃຫ້ໜ້າເອກະສານເກົ່າເຄື່ອນ: ສຳລັບຮູບແບບປົກກະຕິ (Regular) ຍັງຄົງຮັກສາໂຄງຮ່າງ ແລະ ຂະໜາດເດີມຂອງສະບັບປີ 2012 ໄວ້ 100%. ດັ່ງນັ້ນ, ເມື່ອເປີດເອກະສານເກົ່າ ໜ້າເຈ້ຍຈະບໍ່ມີການຈັດໜ້າໃໝ່.
- ພິເສດ Phetsarath Serif: ສຳລັບທ່ານທີ່ມັກພິມເອກະສານທີ່ມີທັງພາສາລາວ ແລະ ອັງກິດປົນກັນ ທາງທີມງານຍັງໄດ້ອອກຟອນ Phetsarath Serif ທີ່ລວມເອົາພາສາລາວແບບເພັດຊະລາດ ແລະ ພາສາອັງກິດແບບ Times ໄວ້ໃນຟອນດຽວ ບໍ່ຕ້ອງເສຍເວລາສະຫຼັບຟອນໄປມາ.
.
📥 ວິທີການດາວໂຫຼດ ແລະ ຕິດຕັ້ງ
ຟອນນີ້ເປີດໃຫ້ດາວໂຫຼດໄປນຳໃຊ້ໄດ້ຟຣີ (ພາຍໃຕ້ລິຂະສິດ SIL Open Font License) ໂດຍສາມາດເຂົ້າໄປດາວໂຫຼດໄຟລ໌ໄດ້ທີ່ເວັບໄຊທ໌: phetsarath.mts.la
+ ສຳລັບລະບົບ Windows:
- ເຂົ້າໄປລຶບຟອນ Phetsarath ເກົ່າອອກກ່ອນ (ໄປທີ່ Settings → Personalization → Fonts).
- ແຕກໄຟລ໌ ZIP ທີ່ດາວໂຫຼດມາ ແລະ ເລືອກເອົາໄຟລ໌ຟອນທັງ 12 ໄຟລ໌.
- ຄລິກຂວາໃສ່ໄຟລ໌ທີ່ເລືອກ ແລ້ວກົດ "Install for all users".
- ປິດແລ້ວເປີດໂປຣແກຣມ Word ຫຼື ໂປຣແກຣມອື່ນໆຄືນໃໝ່ ກໍສາມາດໃຊ້ງານໄດ້ທັນທີ.
+ ສຳລັບລະບົບ macOS:
- ເປີດແອັບ Font Book ແລ້ວລຶບຟອນ Phetsarath ສະບັບເກົ່າອອກ.
- ແຕກໄຟລ໌ ZIP ທີ່ດາວໂຫຼດມາ.
- ເລືອກໄຟລ໌ຟອນທັງໝົດ, ເປີດດ້ວຍ Font Book ແລ້ວກົດ "Install".
.
ການນຳໃຊ້ຟອນ Phetsarath OT v4.103 ຖືເປັນການກ້າວໄປອີກຂັ້ນໜຶ່ງຂອງການພັດທະນາພາສາລາວໃນລະບົບດິຈິຕອນ ທີ່ຕອບໂຈດການນຳໃຊ້ຕົວຈິງ. ພະນັກງານ-ລັດຖະກອນ, ຄູ-ອາຈານ ແລະ ຜູ້ທີ່ສົນໃຈ ສາມາດລອງດາວໂຫຼດມາຕິດຕັ້ງ ເພື່ອປະສົບການພິມເອກະສານທີ່ລ່ຽນໄຫຼ ແລະ ສວຍງາມຍິ່ງຂຶ້ນ.
✍️ ແຫຼ່ງຂ່າວ: ພະແນກສຶກສາທິການ ແລະ ກິລາ