ກະຊວງສຶກສາທິການ ແລະ ກິລາ ເຊີນນັກຮຽນລາວສະໝັກຮ່ວມແຂ່ງຂັນໂອລິມປິກສາກົນດ້ານການປ່ຽນແປງດິນຟ້າອາກາດ ຢູ່ຣັດເຊຍ

=================

ກະຊວງສຶກສາທິການ ແລະ ກິລາ ແຫ່ງ ສປປ ລາວ ໄດ້ອອກແຈ້ງການທາງການ ສະບັບເລກທີ 3476/ຫກ, ລົງວັນທີ 24 ກໍລະກົດ 2026 ເຊີນຊວນນັກຮຽນລາວທີ່ມີຄວາມສົນໃຈ ແລະ ມີພອນສະຫວັນ ສະໝັກເຂົ້າຮ່ວມການແຂ່ງຂັນ The International Olympiad on Climate Change and Environmental Issues (IOCE-2026).

.

ການແຂ່ງຂັນດັ່ງກ່າວ ຈະຈັດຂຶ້ນລະຫວ່າງວັນທີ 20-29 ກັນຍາ 2026 ທີ່ເຂດ Sirius Federal Territory, ນະຄອນ Sochi, ປະເທດ ສະຫະພັນຣັດເຊຍ. ຈຸດປະສົງແມ່ນເພື່ອສົ່ງເສີມຄວາມຮູ້ນິເວດວິທະຍາ, ພັດທະນາທ່າແຮງທີ່ສ້າງສັນ ແລະ ວິທະຍາສາດຂອງຜູ້ເຂົ້າຮ່ວມ, ແລະ ສ້າງຄວາມເຂັ້ມແຂງໃຫ້ແກ່ການຮ່ວມມືສາກົນໃນດ້ານການປົກປັກຮັກສາສິ່ງແວດລ້ອມ.

.

ເປົ້າໝາຍຜູ້ເຂົ້າຮ່ວມແມ່ນນັກຮຽນທີ່ມີອາຍຸລະຫວ່າງ 14-18 ປີ, ໂດຍຈະຄັດເລືອກເອົາທີມຕົວແທນປະເທດລາວ ຈໍານວນ 2-5 ຄົນ, ພ້ອມດ້ວຍຫົວໜ້າຄະນະ 1 ຄົນ ແລະ ຜູ້ສັງເກດການບໍ່ເກີນ 2 ຄົນ. ພາສາທີ່ໃຊ້ໃນການແຂ່ງຂັນແມ່ນພາສາອັງກິດ, ໂດຍຈະມີການແຂ່ງຂັນທັງພາກທິດສະດີ ແລະ ພາກປະຕິບັດຕົວຈິງ.

.

ກ່ຽວກັບຄ່າໃຊ້ຈ່າຍ ປະເທດເຈົ້າພາບ ຈະຮັບຜິດຊອບຄ່າທີ່ພັກ, ຄ່າອາຫານ, ຄ່າເດີນທາງພາຍໃນປະເທດ ແລະ ຄ່າປະກັນໄພສໍາລັບນັກຮຽນ ແລະ ຫົວໜ້າຄະນະ. ສ່ວນຄ່າເດີນທາງ (ປີ້ຍົນໄປ-ກັບ) ແມ່ນຜູ້ສະໝັກ ຫຼື ຝ່າຍລາວເປັນຜູ້ຮັບຜິດຊອບເອງ.

.

ຜູ້ທີ່ມີຄວາມສົນໃຈສາມາດສຶກສາລາຍລະອຽດ ແລະ ລົງທະບຽນດ້ວຍຕົນເອງໄດ້ທີ່ເວັບໄຊສທາງການ: https://ioce.siriusolymp.ru ກໍານົດເວລາປິດຮັບສະໝັກແມ່ນວັນທີ 24 ສິງຫາ 2026.

.

ນີ້ເປັນໂອກາດອັນດີທີ່ນັກຮຽນລາວຈະໄດ້ສະແດງຄວາມສາມາດໃນເວທີສາກົນ, ຮຽນຮູ້ກ່ຽວກັບບັນຫາສິ່ງແວດລ້ອມລະດັບໂລກ, ແລະ ສ້າງເຄືອຂ່າຍກັບເພື່ອນນັກຮຽນຈາກປະເທດຕ່າງໆ. ຜູ້ສົນໃຈສາມາດຕິດຕໍ່ພະແນກສຶກສາທິການ ແລະ ກິລາ ນະຄອນຫຼວງວຽງຈັນ ແລະ ແຂວງ ເພື່ອຂໍຂໍ້ມູນເພີ່ມເຕີມ.