ໃນພິທີ ທ່ານ ຄຳພວຍ ວິໄລເດດວົງສາ ຮອງປະທານສະຫະພັນກຳມະບານແຂວງ ໄດ້ຍົກໃຫ້ເຫັນເຖິງປະຫວັດຄວາມເປັນມາ ແລະ ການກຳເນີດຂອງສະຫະພັນກຳມະບານລາວ ຢ່າງເລິກເຊິ່ງ. ທ່ານໄດ້ບັນລະຍາຍຍ້ອນຮອຍອະດີດເຖິງຍຸກສະໄໝແຫ່ງການຕໍ່ສູ້ ທີ່ຊາວຜູ້ອອກແຮງງານ ແລະ ກຳມະກອນລາວ ຕ້ອງປະເຊີນກັບການກົດຂີ່ຂູດຮີດ ຖືກບັງຄັບໃຫ້ອອກແຮງງານໜັກໜ່ວງແຕ່ພັດໄດ້ຮັບຄ່າແຮງງານທີ່ໜ້ອຍ ບໍ່ກຸ້ມກິນ ແລະ ຖືກປຸ້ນສະດົມສິດເສລີພາບຂັ້ນພື້ນຖານ. ຈາກຄວາມເຄັ່ງຕຶງ ແລະ ຄວາມບໍ່ເປັນທຳດັ່ງກ່າວ ຈຶ່ງໄດ້ກໍ່ໃຫ້ເກີດມີຂະບວນການຕໍ່ສູ້ຂອງຊົນຊັ້ນກຳມະກອນຢ່າງແຂງແຮງ. ເພື່ອຕອບສະໜອງກັບຄວາມຮຽກຮ້ອງຕ້ອງການຂອງການປະຕິວັດໃນໄລຍະໃໝ່ ແລະ ເພື່ອເຕົ້າໂຮມຄວາມສາມັກຄີກຳລັງແຮງຂອງກຳມະກອນ ພັກຈຶ່ງໄດ້ຕົກລົງສ້າງຕັ້ງອົງການຈັດຕັ້ງກຳມະບານລາວຂຶ້ນ ເພື່ອໃຫ້ກາຍເປັນຕົວແທນຢ່າງເປັນທາງການ ໃນການປົກປ້ອງສິດ ແລະ ຜົນປະໂຫຍດອັນຊອບທຳ ຂອງຊົນຊັ້ນກຳມະກອນ ແລະ ຊາວຜູ້ອອກແຮງງານລາວ. ຕະຫຼອດໄລຍະ 70 ປີແຫ່ງການເຕີບໃຫຍ່ຂະຫຍາຍຕົວ ອົງການກຳມະບານໄດ້ສືບທອດມູນເຊື້ອອັນສະຫງ່າງາມ ແລະ ປະກອບສ່ວນຢ່າງໃຫຍ່ຫຼວງເຂົ້າໃນພາລະກິດສ້າງສາພັດທະນາປະເທດຊາດ.
ພ້ອມດຽວກັນນີ້ ໃນຕອນທ້າຍຂອງພິທີ ທ່ານ ວັນນະເລດ ມະນີວົງ ຍັງໄດ້ໃຫ້ກຽດມີຄຳເຫັນໂອ້ລົມ ແລະ ຊີ້ທິດເຍືອງທາງແກ່ສະມາຊິກກຳມະບານ ໂດຍໄດ້ເນັ້ນໜັກເຖິງການສືບຕໍ່ພັດທະນາວຽກງານກຳມະບານໃຫ້ມີຄວາມກ້າວໜ້າຢ່າງບໍ່ຢຸດຢັ້ງ. ພິເສດ ທ່ານໄດ້ເປີດເຜີຍເຖິງແຜນການລິເລີ່ມທີ່ສຳຄັນ ໃນການກະກຽມສ້າງຕັ້ງ "ຕູ້ເກັບຫາງສຽງປະຊາຊົນ" ເຊິ່ງຈະເປັນຊ່ອງທາງ ແລະ ເຄື່ອງມືອັນສຳຄັນໃນການຮັບຟັງຄຳຄິດຄຳເຫັນ ຂໍ້ສະເໜີແນະ ແລະ ຄວາມຕ້ອງການອັນແທ້ຈິງຂອງສະມາຊິກກຳມະບານ ຄູ-ອາຈານ ກໍຄືປະຊາຊົນທົ່ວໄປ ເພື່ອນຳມາປັບປຸງແກ້ໄຂບັນຫາຕ່າງໆຢ່າງທັນທ່ວງທີ ໂປ່ງໃສ ແລະ ຮັບປະກັນໃຫ້ສິດຜົນປະໂຫຍດຂອງຊາວຜູ້ອອກແຮງງານທຸກຄົນໄດ້ຮັບການເບິ່ງແຍງຢ່າງຍຸຕິທຳ.
✍️ ຂ່າວ/ພາບ: ສະຫະພັນກຳມະບານ ພະແນກສຶກສາທິການ ແລະ ກິລາແຂວງສະຫວັນນະເຂດ
