ໃນຕອນເຊົ້າຂອງວັນທີ 30 ມັງກອນ 2026 ທີ່ ຫ້ອງປະຊຸມ ພະແນກສຶກສາທິການ ແລະ ກິລາແຂວງສະຫວັນນະເຂດ ໄດ້ມີການຈັດກອງປະຊຸມເຝິກອົບຮົມໃນຫົວຂໍ້ "ການຂຽນບົດວິໄຈທາງການສຶກສາ" ໃຫ້ແກ່ພະນັກງານ ແລະ ວິຊາການພາຍໃນຂະແໜງການ. ໂດຍການເປັນປະທານຂອງ ທ່ານ ພິມມະສອນ ວໍລະຍຸດ ຮອງຫົວໜ້າພະແນກສຶກສາທິການ ແລະ ກິລາແຂວງສະຫວັນນະເຂດ, ວິທະຍາກອນ, ພະນັກງານວິຊາການຈາກຂະແໜງການຕ່າງໆຂອງພະແນໄດ້ເຂົ້າຮ່ວມ.
ຈຸດປະສົງຂອງການເຝິກອົບຮົມໃນຄັ້ງນີ້ ແມ່ນເພື່ອສ້າງຄວາມຮູ້, ຄວາມເຂົ້າໃຈທີ່ຖືກຕ້ອງກ່ຽວກັບຂະບວນການເຮັດວິໄຈ, ການຂຽນບົດຄວາມວິຊາການ ແລະ ການນຳໃຊ້ເຕັກໂນໂລຊີເຂົ້າຊ່ວຍໃນການຄົ້ນຄວ້າ ເພື່ອຍົກລະດັບຄຸນນະພາບການສຶກສາພາຍໃນແຂວງໃຫ້ສູງຂຶ້ນ. ໃນວາລະກອງປະຊຸມ ໄດ້ຮັບກຽດບັນຍາຍ ແລະ ຖ່າຍທອດບົດຮຽນຈາກ ຄະນະວິທະຍາກອນຜູ້ຊົງຄຸນວຸດທິ ຈຳນວນ 5 ທ່ານ ຄື:
- ທ່ານ ອຈ.ປອ ນາງ ເພັດວິໄລ ຂັດຕິຍະວົງ
- ທ່ານ ອຈ.ປອ ອິນສົ່ງ ລາສະສານ
- ທ່ານ ອຈ.ປທ ສຸກສັນ ນວນທະວົງ
- ທ່ານ ອຈ.ປທ ນາງ ພວງເພັດ ສູນທະລາວົງ
- ທ່ານ ອຈ.ປທ ຄໍາຫຼ້າ ແສງລັດສະໝີ
ເນື້ອໃນການເຝິກອົບຮົມໄດ້ກວມເອົາບັນດາຫົວຂໍ້ທີ່ສຳຄັນ ປະກອບມີ: ພາບລວມຂອງການວິໄຈທາງການສຶກສາ, ໂຄງສ້າງ ແລະ ເຕັກນິກການຂຽນບົດວິໄຈ 5 ບົດ (ບົດນຳ, ທົບທວນເອກະສານ, ວິທີດຳເນີນການ, ຜົນການວິເຄາະ ແລະ ສະຫຼຸບຜົນ), ຫຼັກການຂຽນບົດຄວາມວິຊາການເພື່ອຕີພິມເຜີຍແຜ່ ແລະ ການນຳໃຊ້ເຕັກໂນໂລຊີ AI ເຂົ້າຊ່ວຍໃນຂະບວນການວິໄຈ ໃຫ້ມີຄວາມສະດວກ ແລະ ທັນສະໄໝ.
ໃນໂອກາດນີ້ ທ່ານ ພິມມະສອນ ວໍລະຍຸດ ຮອງຫົວໜ້າພະແນກສຶກສາທິການ ແລະ ກິລາແຂວງສະຫວັນນະເຂດ ກໍໄດ້ໃຫ້ກຽດຂຶ້ນມີຄຳເຫັນໂອ້ລົມ ແລະ ເຈາະຈີ້ມຕໍ່ກອງປະຊຸມ. ທ່ານໄດ້ເນັ້ນໜັກໃຫ້ຜູ້ເຂົ້າຮ່ວມທຸກທ່ານ ຈົ່ງພ້ອມກັນເອົາໃຈໃສ່ສຶກສາຮຽນຮູ້ຂະບວນການວິໄຈຢ່າງເລິກເຊິ່ງ ເພາະການວິໄຈແມ່ນເຄື່ອງມືສຳຄັນໃນການແກ້ໄຂບັນຫາການຮຽນ-ການສອນ ຢ່າງເປັນວິທະຍາສາດ. ທ່ານຍັງໄດ້ຮຽກຮ້ອງໃຫ້ພະນັກງານວິຊາການ ນຳເອົາຄວາມຮູ້ກ່ຽວກັບການຂຽນບົດວິໄຈ ແລະ ການນຳໃຊ້ເຕັກໂນໂລຊີ AI ທີ່ໄດ້ຮຽນຮູ້ໃນຄັ້ງນີ້ ໄປຜັນຂະຫຍາຍເຂົ້າໃນໜ້າວຽກຕົວຈິງ ເພື່ອພັດທະນາຕົນເອງ ແລະ ອົງກອນໃຫ້ມີປະສິດທິພາບສູງຂຶ້ນ.
ການຈັດເຝິກອົບຮົມຄັ້ງນີ້ ຖືເປັນນິມິດໝາຍອັນດີໃນການພັດທະນາບຸກຄະລາກອນທາງການສຶກສາຂອງແຂວງສະຫວັນນະເຂດ ໃຫ້ມີທັກສະໃນການຄົ້ນຄວ້າວິໄຈ, ສາມາດແກ້ໄຂບັນຫາການຮຽນ-ການສອນ ຢ່າງເປັນລະບົບ ແລະ ມີວິທະຍາສາດ.
✍️ ຂ່າວ/ພາບ: ພະແນກສຶກສາທິການ ແລະ ກິລາແຂວງສະຫວັນນະເຂດ
