ຄະນະຜູ້ແທນຈາກ ໂຄງການສົ່ງເສີມອາຫານທ່ຽງໃນໂຮງຮຽນ (LEAPS III) ນຳໂດຍ ທ່ານ ໂຈຊົວ ພູນ (Mr. Joshua Poon) ຜູ້ຕາງໜ້າອົງການບັນເທົາທຸກກາໂຕລິກ (CRS) ປະຈໍາ ສປປ ລາວ, ທ່ານ ນາງ ຄາເທຍ ຣີຊິໂອ (Ms. Katia Rizzo) ເລຂາ 2 ສະຖານທູດອົດສະຕາລີ ປະຈຳ ສປປ ລາວ ແລະ ທ່ານ ເຈັບຟີ ພິວແກຼມ (Mr. Jeffy Pilgram) ຕາງໜ້າໂຄງການ BEQUAL ພ້ອມດ້ວຍ ທ່ານ ສະມາຊິກສະພາແຫ່ງຊາດ, ຄະນະກົມຈາກກະຊວງສຶກສາ, ພະແນກການຕ່າງປະເທດ ແລະ ພະແນກ ສກຂ ໄດ້ລົງເຄື່ອນໄຫວຢ້ຽມຢາມພື້ນທີ່ໂຄງການຕົວຈິງ ຢູ່ທີ່ ເມືອງເຊໂປນ.
ເພື່ອໃຫ້ການຕິດຕາມວຽກງານມີຄວາມທົ່ວເຖິງ ທາງຄະນະຜູ້ແທນໄດ້ແບ່ງອອກເປັນ 2 ກຸ່ມ ເພື່ອລົງຢ້ຽມຢາມກຸ່ມຜະລິດກະສິກຳທີ່ເປັນຕົ້ນແບບໃນການສະໜອງວັດຖຸດິບໃຫ້ແກ່ໂຮງຮຽນ ຄື:
ກຸ່ມທີ 1: ລົງຢ້ຽມຢາມ ກຸ່ມຜະລິດກະສິກຳ ບ້ານທ່າໂຂ່ງ.
ກຸ່ມທີ 2: ລົງຢ້ຽມຢາມ ກຸ່ມຜະລິດກະສິກຳ ບ້ານເມືອງຈັນ.
ຢູ່ທີ່ ບ້ານເມືອງຈັນ ຄະນະໄດ້ຮັບຟັງການລາຍງານຈາກ ທ່ານ ມະນີວົງ ພອນບຸບຜາ ຫົວໜ້າກຸ່ມສວນຜັກ ໂດຍໃຫ້ຮູ້ວ່າ: ປັດຈຸບັນກຸ່ມມີເຮືອນຮົ່ມທັງໝົດ 9 ຫຼັງ (ໂຄງໄມ້ 5 ຫຼັງ ແລະ ໄດ້ຮັບການສະໜັບສະໜູນໂຄງເຫຼັກຕື່ມ 4 ຫຼັງ) ໂດຍແບ່ງໃຫ້ສະມາຊິກຮັບຜິດຊອບຄອບຄົວລະ 1 ຫຼັງ. ພືດຜັກທີ່ປູກມີ ຜັກກາດນາ, ຫອມບົ່ວ, ສະຫຼັດ ແລະ ອື່ນໆ ອີງຕາມຄວາມຕ້ອງການຂອງຕະຫຼາດ ເເຊິ່ງເນັ້ນສະໜອງໃຫ້ໂຮງຮຽນເປັນຫຼັກ. ຈຸດທີ່ພົ້ນເດັ່ນຄື ທາງກຸ່ມໄດ້ໃຫ້ຄຳໝັ້ນສັນຍາວ່າ ພາຍຫຼັງໂຄງການສິ້ນສຸດລົງ ຈະສືບຕໍ່ຂາຍຜັກໃຫ້ໂຮງຮຽນໃນ ລາຄາຫຼຸດ 50% ເພື່ອຄວາມຍືນຍົງ. ພ້ອມກັນນັ້ນ ຫ້ອງການກະສິກຳເມືອງ ກໍພ້ອມທີ່ຈະຊ່ວຍຊອກຫາແຫຼ່ງທຶນ, ສ້າງກອງທຶນບ້ານ ແລະ ກວດກາຄຸນນະພາບຜັກໃຫ້ໄດ້ມາດຕະຖານຢ່າງຕໍ່ເນື່ອງ.
ພາຍຫຼັງສຳເລັດການຢ້ຽມຢາມກຸ່ມຜະລິດແລ້ວ ທັງສອງກຸ່ມໄດ້ກັບມາເຕົ້າໂຮມກັນຢູ່ທີ່ ໂຮງຮຽນປະຖົມ ບ້ານເມືອງຈັນ ເພື່ອຢ້ຽມຊົມການຈັດຕັ້ງປະຕິບັດວຽກງານອາຫານທ່ຽງໃນໂຮງຮຽນ. ໃນໂອກາດນີ້ ຄະນະຜູ້ແທນ ໄດ້ໃຫ້ກຽດເຂົ້າຮ່ວມກິດຈະກຳ ແຈກຢາຍອາຫານທ່ຽງ ໃຫ້ນ້ອງນັກຮຽນ ແລະ ຮ່ວມຮັບປະທານອາຫານທ່ຽງກັບຊຸມຊົນ ດ້ວຍບັນຍາກາດທີ່ອົບອຸ່ນ ແລະ ເປັນກັນເອງ.
ການລົງເຄື່ອນໄຫວໃນຕອນເຊົ້ານີ້ ແມ່ນເພື່ອເປັນການຕິດຕາມເບິ່ງການເຊື່ອມໂຍງ ລະຫວ່າງ ການຜະລິດກະສິກຳໃນຊຸມຊົນ ແລະ ວຽກງານໂພຊະນາການໃນໂຮງຮຽນ.
