ພະແນກສຶກສາທິການ ແລະ ກິລາ ແຂວງສະຫວັນນະເຂດ ອອກແຈ້ງການເປີດຮັບນັກຮຽນທີ່ຈົບຊັ້ນ ມ.7 ຫຼື ທຽບເທົ່າ ເຂົ້າສຶກສາຕໍ່ສາຍຄູ ທີ່ມະຫາວິທະຍາໄລສະຫວັນນະເຂດ ແລະ ວິທະຍາໄລຄູສະຫວັນນະເຂດ ປະຈຳສົກຮຽນ 2026-2027. ການຮັບສະໝັກໃນຄັ້ງນີ້ແມ່ນຢູ່ພາຍໃຕ້ທຶນການສຶກສາຂອງທ່ານປະທານຄະນະກຳມະການປົກຄອງແຂວງສະຫວັນນະເຂດ ສົມທົບກັບທຶນແບ່ງປັນຂອງລັດຖະບານ ເພື່ອສ້າງບຸກຄະລາກອນຄູຕອບສະໜອງຄວາມຮຽກຮ້ອງຕ້ອງການຂອງສັງຄົມໃນຕໍ່ໜ້າ.

.

ອີງຕາມເອກະສານແຈ້ງການ "ແຈ້ງການເປີດຮັບນັກຮຽນເຂົ້າຮຽນຄູ ປະຈຳສົກຮຽນ26-27" ສົກຮຽນນີ້ມີທຶນການສຶກສາທັງໝົດ 390 ທຶນ ໂດຍແບ່ງປັນໃຫ້ 14 ເມືອງ ແລະ 01 ນະຄອນ ໄດ້ຮັບໂຄຕາເມືອງລະ 26 ທຶນ.

ລາຍລະອຽດການແບ່ງທຶນໃນແຕ່ລະເມືອງມີດັ່ງນີ້:

- ສາຍຄູອະນຸບານ ລະບົບ (12+2) ລະດັບຊັ້ນສູງ: 06 ທຶນ.

- ສາຍຄູປະຖົມ ລະບົບ (12+2) ລະດັບຊັ້ນສູງ: 10 ທຶນ.

- ສາຍຄູມັດທະຍົມ ລະບົບ (12+4) ລະດັບປະລິນຍາຕີ: 10 ທຶນ (ວິຊາລະ 01 ທຶນ).

- ຮຽນທີ່ວິທະຍາໄລຄູສະຫວັນນະເຂດ ມີສາຂາ: ຄູເຄມີສາດ, ຄູຊີວະສາດ, ຄູໄອຊີທີ, ຄູພາສາອັງກິດ ແລະ ຄູພາສາລາວ.

- ຮຽນທີ່ມະຫາວິທະຍາໄລສະຫວັນນະເຂດ ມີສາຂາ: ຄູຄະນິດສາດ, ຄູຟີຊິກສາດ, ຄູປະຫວັດສາດ, ຄູພູມສາດ ແລະ ຄູວິທະຍາສາດການເມືອງ.

.

ນັກສຶກສາທີ່ຜ່ານການຄັດເລືອກຈະໄດ້ຮັບນະໂຍບາຍເງິນອຸດໜູນເບ້ຍລ້ຽງລວມ 1.400.000 ກີບຕໍ່ຄົນຕໍ່ເດືອນ (ປະກອບມີ ເງິນອຸດໜູນຈາກປະທານຄະນະກຳມະການປົກຄອງແຂວງ 700.000 ກີບ ແລະ ເງິນເບ້ຍລ້ຽງຂອງລັດຖະບານ 700.000 ກີບ) ໄປຈົນກວ່າຈະຮຽນຈົບ. ນອກຈາກນີ້, ຍັງໄດ້ຮັບການຍົກເວັ້ນຄ່າທຳນຽມຮຽນ, ຄ່ານໍ້າ, ຄ່າໄຟຟ້າ, ຄ່າອະນາໄມ ແລະ ຄ່າຫໍພັກ ໂດຍນັກສຶກສາຕ້ອງຮັບຜິດຊອບຄ່າເດີນທາງ, ເຄື່ອງນຸ່ງຫົ່ມ, ຊຸດບ່ອນນອນ ແລະ ອຸປະກອນການຮຽນດ້ວຍຕົນເອງ.

.

ສຳລັບມາດຖານເງື່ອນໄຂຂອງຜູ້ສະໝັກມີດັ່ງນີ້:

- ຕ້ອງແມ່ນຜູ້ທີ່ຮຽນຈົບຊັ້ນ ມ.7 ຫຼື ທຽບເທົ່າ

- ມີສຸຂະພາບແຂງແຮງ, ມີຄວາມມັກຮັກໃນອາຊີບຄູ

- ມີຄຸນສົມບັດດີ ແລະ ມີຜົນການຮຽນດີ ໂດຍຄະແນນສະເລ່ຍຕ້ອງບໍ່ຫຼຸດ 6

ຜູ້ທີ່ໄດ້ຮັບທຶນຈະຕ້ອງໄດ້ເຮັດໜັງສືສັນຍາກັບຫ້ອງການສຶກສາທິການ ແລະ ກິລາ ນະຄອນ/ເມືອງ ເຊິ່ງກຳນົດວ່າຫຼັງຈາກຮຽນຈົບແລ້ວ ຕ້ອງຍິນດີປະຈຳການຕາມການສັບຊ້ອນຂອງຂັ້ນເທິງ ໂດຍສະເພາະເຂດຫ່າງໄກສອກຫຼີກທີ່ຕ້ອງການຄູ.

.

ປັດຈຸບັນ, ຫ້ອງການສຶກສາທິການ ແລະ ກິລາ 14 ເມືອງ 01 ນະຄອນ ພວມດຳເນີນການຄັດເລືອກ ແລະ ຈະຕ້ອງສັງລວມລາຍຊື່ນັກຮຽນພ້ອມເຮັດໜັງສືສັນຍາ ສົ່ງໃຫ້ພະແນກສຶກສາທິການ ແລະ ກິລາແຂວງ ຂະແໜງວິທະຍາສາດ, ອາຊີວະສຶກສາ ແລະ ການສຶກສາຊັ້ນສູງ ບໍ່ໃຫ້ກາຍ ວັນທີ 20 ສິງຫາ 2026 ນີ້.

ສາມາດພົວພັນສອບຖາມໄດ້ທີ່:

- ທ່ານ ກິໂຕ ພົມມະໄກສອນ ໂທ: 020 94344960

- ທ່ານ ສີປະເສີດ ແກ້ວມະນີໄຊ ໂທ: 020 91708483.

ໃນວັນທີ 14 ສິງຫາ 2026 ທີ່ໂຮງຮຽນມັດທະຍົມສົມບູນ ສະຫວັນ ນະຄອນໄກສອນ ພົມວິຫານ ແຂວງສະຫວັນນະເຂດ ໄດ້ມີພິທີວາງສີລາລຶກ ແລະ ເປີດໂຄງການຍົກລະດັບ-ປັບປຸງກໍ່ສ້າງອາຄານຮຽນ ຂອງໂຮງຮຽນ ມສ ສະຫວັນ ຢ່າງເປັນທາງການ. ໂຄງການດັ່ງກ່າວແມ່ນໄດ້ຮັບທຶນຊ່ວຍເຫຼືອລ້າຈາກລັດຖະບານ ສປ ຈີນ ພາຍໃຕ້ໂຄງການ CHINA AID For Shared Future ກວ່າ 60 ລ້ານຢວນ ເພື່ອຍົກລະດັບພື້ນຖານໂຄງລ່າງດ້ານການສຶກສາໃຫ້ທັນສະໄໝ ໂດຍການປະສານງານ ແລະ ຮ່ວມມືກັບ ພະແນກສຶກສາທິການ ແລະ ກິລາແຂວງສະຫວັນນະເຂດ ເຊິ່ງການຈັດງານຄັ້ງນີ້ຍັງເປັນການສະເຫຼີມສະຫຼອງ ສາຍພົວພັນການທູດ ລາວ-ຈີນ ຄົບຮອບ 65 ປີ ອີກດ້ວຍ.

.

ໃນພິທີ, ໃຫ້ກຽດເຂົ້າຮ່ວມເປັນປະທານໂດຍ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ທອງໃສ ໄຊຍະວົງຄຳດີ ຮອງປະທານຄະນະກຳມະການປົກຄອງແຂວງສະຫວັນນະເຂດ, ທ່ານ ຄຳແພງ ລັດມະນີ ຫົວໜ້າຫ້ອງການ ຄະນະກຳມະການຮ່ວມມື ລາວ-ຈີນ ແລະ ທ່ານ ນາງ ຫຼີຊີເຈີ່ນ ທີ່ປຶກສາດ້ານເສດຖະກິດ ສະຖານເອກອັກຄະຣັດຖະທູດ ສປ ຈີນ ປະຈຳ ສປປ ລາວ. ພ້ອມນີ້ ກໍຍັງມີ ທ່ານ ນາງ ບໍ່ແກ້ວ ແກ້ວພາວັນ ຮອງຫົວໜ້າພະແນກສຶກສາທິການ ແລະ ກິລາແຂວງສະຫວັນນະເຂດ, ທ່ານ ອຳພອນ ຂາວເພຍສຸພົມ ຮອງຫົວໜ້າພະແນກສຶກສາທິການ ແລະ ກິລາແຂວງສະຫວັນນະເຂດ ທັງເປັນຄະນະຈັດຕັ້ງພິທີ, ຕະຫຼອດຮອດການນຳຂັ້ນຕ່າງໆ, ຕົວແທນຈາກ ກຸ່ມບໍລິສັດຮ່ວມມືດ້ານເສດຖະກິດ-ເຕັກນິກສາກົນຈຽງຊູຈີນ ຈຳກັດ ເຊິ່ງເປັນບໍລິສັດຮັບເໝົາກໍ່ສ້າງ ພ້ອມດ້ວຍຄູ-ອາຈານ ແລະ ນັກຮຽນເຂົ້າຮ່ວມຢ່າງພ້ອມພຽງ.

.

ໃນວາລະພິທີ ຫຼັງຈາກ ທ່ານ ອຳພອນ ຂາວເພຍສຸພົມ ໄດ້ຕາງໜ້າຄະນະຈັດຕັ້ງພິທີກ່າວຈຸດປະສົງ ແລະ ຕ້ອນຮັບແຂກຜູ້ມີກຽດແລ້ວ ພາຍໃນງານຍັງໄດ້ມີການສະແດງສິລະປະຟ້ອນພື້ນເມືອງລາວ 3 ລາຍການ ຈາກນ້ອງນັກຮຽນໂຮງຮຽນ ມສ ສະຫວັນ ແລະ ໂຮງຮຽນ ມສ ຈຸງເຕັກ, ພ້ອມທັງມີການມອບອຸປະກອນການສຶກສາໃຫ້ແກ່ນັກຮຽນທີ່ເຂົ້າຮ່ວມການສະແດງ ໂດຍຕາງໜ້າບໍລິສັດຮັບເໝົາກໍ່ສ້າງຝ່າຍຈີນຕື່ມອີກ.

.

ຈາກນັ້ນ, ທ່ານ ທອງໃສ ໄຊຍະວົງຄຳດີ ໄດ້ກ່າວປາໄສວ່າ: ໂຮງຮຽນ ມສ ສະຫວັນ ສ້າງຕັ້ງຂຶ້ນແຕ່ປີ 1960 ເຊິ່ງມີປະຫວັດຍາວນານ ແຕ່ປັດຈຸບັນສະພາບອາຄານແມ່ນໄດ້ຊຸດໂຊມລົງຫຼາຍ. ເພື່ອຕອບສະໜອງຄວາມຮຽກຮ້ອງຕ້ອງການໃນການຍົກລະດັບຄຸນນະພາບການສຶກສາ ລັດຖະບານ ສປ ຈີນ ຈຶ່ງໄດ້ມອບທຶນຊ່ວຍເຫຼືອລ້າເພື່ອນຳມາຈັດຕັ້ງປະຕິບັດໜ້າວຽກຫຼັກຄື: ການທຸບມ້າງອາຄານເກົ່າ, ການກໍ່ສ້າງອາຄານໃໝ່, ການສະໜອງອຸປະກອນການຮຽນ-ການສອນ ແລະ ການຝຶກອົບຮົມການນຳໃຊ້ອຸປະກອນໃຫ້ແກ່ຄູ-ອາຈານ.

.

ສຳລັບພາບລວມຂອງໂຄງການກໍ່ສ້າງໃໝ່ນີ້ ແມ່ນກວມເອົາເນື້ອທີ່ປະມານ 10.000 ຕາແມັດ, ມີເນື້ອທີ່ອາຄານທັງໝົດ 6.095 ຕາແມັດ ເຊິ່ງປະກອບມີ ອາຄານສິດສອນ ແລະ ຫໍກິລາໃນຮົ່ມ, ອາຄານສຳນັກງານ, ປ້ອມຍາມ ແລະ ພື້ນຖານໂຄງລ່າງດ້ານນອກ. ລາຍລະອຽດແຕ່ລະພາກສ່ວນມີດັ່ງນີ້:

- ອາຄານສິດສອນ: ປະກອບມີ ຫ້ອງຮຽນທົ່ວໄປ, ຫ້ອງທົດລອງຟີຊິກສາດ, ເຄມີສາດ ແລະ ຊີວະສາດ, ຫ້ອງຮຽນວິທະຍາສາດ-ສັງຄົມ, ຫ້ອງຮຽນຮູບແບບທັນສະໄໝ, ຫ້ອງອ່ານໜັງສື, ຫ້ອງປະຖົມພະຍາບານ, ຫ້ອງຄອມພິວເຕີ, ຫ້ອງຄວບຄຸມໄຟ ແລະ ຫ້ອງສູບນໍ້າພາຍໃນ.

- ຫໍກິລາໃນຮົ່ມ: ເປັນສະໜາມຝຶກຊ້ອມບານບ້ວງ ແລະ ບານສົ່ງ ເຊິ່ງປະກອບມີ ເວທີ, ຫ້ອງຄວບຄຸມ, ຫ້ອງເກັບມ້ຽນອຸປະກອນ ແລະ ຖັງດັບເພີງ.

- ອາຄານສຳນັກງານ: ປະກອບມີ ຫ້ອງການຜູ້ອຳນວຍການ, ຫ້ອງການ ແລະ ຫ້ອງປະຊຸມ.

ໂຄງການນີ້ຈະໃຊ້ໄລຍະເວລາການກໍ່ສ້າງ 14 ເດືອນ ໂດຍການຮັບເໝົາກໍ່ສ້າງຂອງ ກຸ່ມບໍລິສັດຮ່ວມມືດ້ານເສດຖະກິດ-ເຕັກນິກສາກົນຈຽງຊູຈີນ ຈຳກັດ.

.

ໂອກາດນີ້, ທ່ານ ກິ່ງມະໂນ ພົມມະຫາໄຊ ໄດ້ກ່າວສະແດງຄວາມຂອບໃຈຕໍ່ພັກ-ລັດ ແລະ ປະຊາຊົນຈີນ ທີ່ໃຫ້ການຊ່ວຍເຫຼືອ ພ້ອມທັງເນັ້ນໜັກວ່າ: ໂຄງການນີ້ບໍ່ແມ່ນພຽງແຕ່ການກໍ່ສ້າງດ້ານວັດຖຸອາຄານເທົ່ານັ້ນ, ແຕ່ມັນແມ່ນໝາກຜົນອັນຈົບງາມຂອງສາຍພົວພັນມິດຕະພາບອັນເປັນມູນເຊື້ອ, ການເປັນຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ ແລະ ການຮ່ວມມືເປັນຄູ່ຮ່ວມຊະຕາກໍາ ລາວ-ຈີນ ຈີນ-ລາວ ຢ່າງແທ້ຈິງ. ທຶນຊ່ວຍເຫຼືອລ້າຄັ້ງນີ້ ຈະເປັນທຶນຮອນອັນມະຫາສານໃນການຫັນປ່ຽນໂສມໜ້າ ແລະ ຍົກລະດັບພື້ນຖານໂຄງລ່າງຂອງ ມສ ສະຫວັນ ໃຫ້ມີຄວາມທັນສະໄໝ, ປອດໄພ ແລະ ເອື້ອອໍານວຍຄວາມສະດວກໃຫ້ແກ່ການຮຽນ-ການສອນໄດ້ຢ່າງເຕັມຮູບແບບ.

.

ຂະນະດຽວກັນ, ທ່ານ ນາງ ຫຼີຊີເຈີ່ນ ກໍໄດ້ກ່າວວ່າ: ໂຄງການຊ່ວຍເຫຼືອລ້າຄັ້ງນີ້ ແມ່ນຈັດຕັ້ງປະຕິບັດຕາມ ແຜນປະຕິບັດງານວ່າດ້ວຍການສ້າງຄູ່ຮ່ວມຊະຕາກໍາ ຈີນ-ລາວ ລາວ-ຈີນ (2024-2028) ແລະ ເປັນບາດກ້າວສຳຄັນຂອງ ໂຄງການກໍ່ສ້າງໂຮງຮຽນ 10 ແຫ່ງ ທີ່ຈີນຊ່ວຍເຫຼືອລາວ. ຝ່າຍຈີນຈະໃຫ້ການສະໜັບສະໜູນຢ່າງເຕັມທີ່ເພື່ອຊຸກຍູ້ການກໍ່ສ້າງ ແລະ ຫວັງຢ່າງຍິ່ງວ່າຈະໄດ້ຮ່ວມມືກັບຝ່າຍລາວຢ່າງໃກ້ຊິດ ເພື່ອຮ່ວມກັນສ້າງໂຄງການດັ່ງກ່າວໃຫ້ກາຍເປັນອະນຸສາວະລີແຫ່ງຍຸກສະໄໝ ທີ່ສະແດງໃຫ້ເຫັນເຖິງໝາກຜົນຂອງການສ້າງຄູ່ຮ່ວມຊະຕາກຳ ຈີນ-ລາວ ຢ່າງມີຊີວິດຊີວາ.

ໃນຕອນທ້າຍຂອງພິທີ, ຄະນະປະທານ ພ້ອມດ້ວຍຄະນະນຳຂັ້ນຕ່າງໆ ແລະ ແຂກທີ່ຖືກເຊີນທຸກພາກສ່ວນ ກໍໄດ້ຮ່ວມກັນຕັດແຖບຜ້າ, ລັ່ນຄ້ອງ 9 ບາດ ພ້ອມທັງຊວ້ານດິນ ເພື່ອວາງສີລາລຶກເປີດໂຄງການຍົກລະດັບ ແລະ ປັບປຸງກໍ່ສ້າງອາຄານຮຽນ ມສ ສະຫວັນ ຢ່າງເປັນທາງການ

📸 ປະມວນຮູບພາບເພີ່ມເຕີມ (9 ຮູບ)

👉 ເລື່ອນເບິ່ງຊ້າຍ-ຂວາ

ຂໍເຊີນຊວນອຳນາດການປົກຄອງບ້ານ ແລະ ທຸກພາກສ່ວນ ຊ່ວຍກັນຊຸກຍູ້ລູກຫຼານທີ່ຢູ່ໃນເງື່ອນໄຂ ເຂົ້າຮ່ວມສະໝັກເພື່ອນຳໃຊ້ໂອກາດອັນດີນີ້ໃນການສ້າງອາຊີບ ແລະ ລາຍຮັບໃນອະນາຄົດ!

📞 ເບີໂທລະສັບຕິດຕໍ່ປະສານງານ: 📲 020 92290204 (WhatsApp) ຫຼື 📲 020 22915191 (WhatsApp). 📑 ເອກະສານແຈ້ງການ ແລະ ແບບຟອມ: https://lnk.ink/pess_staf1959 📍 ເສັ້ນທາງໄປ ວິທະຍາໄລເຕັກນິກ ສະຫວັນນະເຂດ: https://maps.app.goo.gl/HWhZtnNtoW6P52vM9

ຂໍເຊີນຊວນອຳນາດການປົກຄອງບ້ານ ແລະ ທຸກພາກສ່ວນ ຊ່ວຍກັນຊຸກຍູ້ລູກຫຼານທີ່ຢູ່ໃນເງື່ອນໄຂ ເຂົ້າຮ່ວມສະໝັກເພື່ອນຳໃຊ້ໂອກາດອັນດີນີ້ໃນການສ້າງອາຊີບ ແລະ ລາຍຮັບໃນອະນາຄົດ!